0 ورق عنب بطريقة مختلفه من أميرة

السلام عليكم ورحمة الله وبركاته
هلا بنات كيفكم ان شاء الله بصحه طيبه يارب
اليوم يابنات جبت لكم طريقة ورق عنب بس غير
تختلف عن الطريقه المعتاده
فيها زياده في الحموضه
وفيها فلفل رومي (فلفل بارد)
بدل استخدام البقدونس المعتاد
والحموضه الي فيه بسبب كمية الليمون الزايده
والماجي
بس بصراحه حلو
شكل غير
ولأنها حامضه تشبعي منها بسرعه
ماتكثري يعني تقدري تسوي كميه بسيطه
هالطريقة دلتني عليها وحده الله يوفقها يارب
ويسعدها بالدارين
علمتها عليها وحده من صديقاتها
كمان الله يوفقها ويحقق لها مرادها ياااااااااارب
ادعولهم يابنات بجد محتاجين لدعواتكم
اللهم اميييييييييييييين
يالله خلونا ندخل بالموضوع وان شاء الله تعجبنكم
الطريقة
بسم الله
المقادير:

 بصلتين كبيرتين جدااااااااا
كاسه زيت زيتون
فصين ثوم
2 فلفل رومي وسط
ثلاث طماطم وسط
ثلاث ارباع كاسه عصير ليمون
اربع كاسات ونص رز مصري
3 حبات ماجي
ملعقتين بهارات
برطمان ورق عنب
وبطاطس
الطريقة

اول شئ تخلطين جميع المقادير مع بعض
وبالنسبه للماجي اطحنيها مع الليمون
 

وحطيها فوق المقادير السابقه وقلبيها تمام

 وبعدين حطيها على النار الين ما تقل نسبة المويه فيها
طبعا مع التقليب المستمر
لما نحس انها شبه ناشفه

 نبدأ بعملية اللف
اول شئ نحط الرز في نص ورقة العنب ونلفها زي الخطوات الي بالصوره
 

والان نرصها في القدر بعد مانحط في القدر شوي زيت
ونحط فوقه القصدير ثم ندهن القصدير بشوي زيت زيتون
ونرص في القاع شرابح من البطاطس
 

ثم نرص ورق العنب
ثم شرائح ثانيه من البطاطس
ونسكب فوق الخلطه
شوي زيت زيتون مع بهارات على حسب الرغبه
وشوي ليمون كمان وذرة ملح

 ونحط 4 كاسات مويه
ونغطيها بالقصدير كويس
ونخليها على نار هاديه لمدة ساعتين ونص
وبدين نشوف اذ نشفة المويه نزيدها كمان كاسه
المهم انه يبقى اكثر من 3 ساعات على النار
وبعدين نقدمه وبالعافيه
 

وعلى فكره يابنات الي تبي تستخدم الطريقه المعتاده
تحذف الفلفل الرومي وتحط بداله كميه كبيره من البقدون
وتحط واحد ماجي ونص كاسه ليمون
وباقي المقادير زي ماهي والطريقه كمان
وبالتوفيق
ولا تنسون تدعون لهم ^_^

ولأمي وأبوي